On je ocijenio da su časne sestre svojim dobročinstvom zavrijedile poštovanje svih građana Cetinja.

„Vaša bezuslovna spremnost da pomognete je privilegija i neprocjenjiv dar. Predanim radom i ljubavlju vi brišite razlike među ljudima i ujedinjujete ih u dobroti i u dobrim namjerama. Prijestonica Cetinje i njeni građani istinski cijene i prepoznaju vašu plemenitost, ljubav i brižnost, naročito prema siromašnima i bolesnima", poručio je Kašćelan.

Barski nadbiskup u miru monsinjor Zef Gaši, koji posljednje tri godine živi na Cetinju, čestitao je božićne blagdane hrišćanskim vjernicima, navodeći da vrijednosti Božića upućuju na međusobno poštovanje, ljubav i zajedništvo.

Časne sestre Franjevke crnogorske provincije, reda Bezgrešnog začeća, došle su iz Slovenije na Cetinje 1946. godine kada je otvorena specijalna bolnica za plućne bolesti. Tada je rad u antituberkuloznom dispanzeru započelo deset časnih sestara Franjevki, a pedesetih godina prošlog vijeka počele su sa radom i u Bolnici „Danilo I”.